اہم ترین خبریںپاکستان کی اہم خبریں

واقعہ کربلا اسلام کے ابدی پیغام اور جذبہ قربانی کی آبیاری کا سر چشمہ ہے،عمران خان کاپیغام عاشورہ

وزیراعظم نے کہا کہ تاریخ اسلام میں یوم عاشور کی الگ اور خاص اہمیت ہے، یہ رفعت و بلندی امامؑ عالی مقام کی شہادت اور واقعہ کربلا کی بدولت حاصل ہوئی

شیعت نیوز: وزیراعظم عمران خان کا کہنا ہے کہ کربلا کی طرح کشمیر بھی معرکہ حق و باطل کی ایک عظیم مثال ہے، کشمیریوں نے حق پر قائم رہتے ہوئے سنت امام حسینؑ کو زندہ رکھا۔ تفصیلات کے مطابق وزیراعظم عمران خان نے یوم عاشور کے موقع پر قوم کے نام اپنے پیغام میں کہا کہ آج حرمت والے مہینے محرم الحرام کی 10 تاریخ ہے، دنیا بھر کے مسلمان حضرت امام حسینؓ کی لازوال قربانی کی یاد تازہ کرتے ہیں۔

وزیراعظم نے کہا کہ تاریخ اسلام میں یوم عاشور کی الگ اور خاص اہمیت ہے، یہ رفعت و بلندی امامؑ عالی مقام کی شہادت اور واقعہ کربلا کی بدولت حاصل ہوئی، کربلا کا معرکہ یاد دلاتا ہے کسی قربانی سے دریغ نہیں کیا جاسکتا، بچوں جوان بیٹوں اور بھائیوں کو راہ خدا میں نچھاور کرنا سر بلندی ہے۔

انہوں نے کہا کہ جذبہ شبیری ایمان و یقین، سچائی اور اصول پرستی کی روایت کو جلا بخشتا ہے، واقعہ کربلا اسلام کے ابدی پیغام اور جذبہ قربانی کی آبیاری کا سر چشمہ ہے، میرے نزدیک اسوہ حسینؑ کا پیغام ہر قلب سلیم کے لیے ہے۔

یہ بھی پڑھیں: امام حسین ؑنے اسلام کی راہ میں اپنا سر کٹوا کرایثار و قربانی، شجاعت و شہادت کی ایک نئی داستان رقم کی، گورنر سندھ

وزیر اعظم کا کہنا تھا کہ انسان جان جان آفریں کے سپرد کر کے قرآن کے الفاظ کی عملی تصویر بن جائے، قرآن میں ہے کہ اے نفس مطمئنہ اپنے رب کی طرف لوٹ آ کہ تو اس سے راضی ہو۔ جذبے سے سرشار ہو کر ہی ہم اقوام عالم میں قابل ذکر کردار ادا کر سکتے ہیں۔

وزیر اعظم عمران خان نے کشمیر میں بھارتی سامراج سے برسرِ پیکار عوام کی قربانیوں کو خراج تحسین پیش کرتے ہوئے کہا کہ کشمیریوں نے حق پر قائم رہتے ہوئے سنت امام حسینؓ کو زندہ رکھا۔ کربلا کی طرح کشمیر بھی معرکہ حق و باطل کی ایک عظیم مثال ہے۔

ٹیگز
Show More

متعلقہ مضامین

Back to top button
Close